TONGA COLLEGE 'ATELE 100% ( RED pEr kihe auha)

HISITOLIA ‘O E KOLISI TONGA

Kamata‘anga ‘o e Kolisi Tonga

‘I he ‘aho 29 ‘o Sune ‘o e 1881, na‘e fai ai ‘i Nuku‘alofa ‘i he Fale ‘o e Tu‘í (Palasi) ha Fakataha Tokoni fakahisitōlia, ‘a ia na‘e finangalo ai ‘a ‘Ene ‘Afió ko Siaosi Tupou I pea loto kotoa ki ai mo e hou‘eiki mēmipa ‘o e Fakataha Tokoní ke fokotu‘u ‘a e Kolisi Tongá.

Fakatatau ki he ngaahi tohi lekooti ‘oku tauhi ‘e he ‘Ōfisi Palasí, na‘e kamata ‘a e fakatahá ‘aki ha lotu ‘a ia na‘e fai ia ‘e he Tu‘í pea hili iá na‘e hoko ai ‘a e taliuí pea ko kinautolu ‘eni na‘e ‘i he fakatahá. Ko ‘Ene ‘Afió Siaosi Tupou I ko e Tu‘i ‘o Tongá, Misa Peika ko e Palēmiá, Pilinisi Kalauní ko Uiliami Tupoumālohi ko e ‘Eiki Kōvana ‘o Vava‘ú, Siaosi Fatafehi ko e ‘Eiki Kōvana ‘o Ha‘apaí, Pita Fotofili ko e ‘Eiki Kōvana ‘o Niuafo‘oú, Tēvita ‘Ahome‘e ko e Tu‘i Fakamaau Lahí, Sunia Mafile‘o ko e Minisitā Tauhi Pa‘angá, mo Sekonaia Tu‘uhetoka ko e Minisitā Polisí.

Hili ha māhina ‘e hogofulumāono mei he fakatahá ni na‘e toki fokotu‘u leva ‘a e Kolisi Tongá ‘i ‘Okatopa 30, 1882 ‘i Nuku‘alofa ‘i he tu‘u‘anga lolotonga ‘o e Ako Ma‘olunga ‘o Tongá ‘a ia na’e ‘iloa ko Kolisi Pule’anga.

Ko e tohinima ‘oku ha ‘i lalo ko e tatau mo‘oni ‘eni ‘o e tu‘utu‘uni ‘a e Fakataha Tokoni ‘a ‘Ene ‘Afió ko Siaosi Tupou I ‘a ia na‘e fai ‘i he Fale ‘o e Tu‘í (Palasi) ‘i Nuku‘alofa ‘i Sune 29, 1881. Pea ko e kamata‘anga ‘eni ‘o e Kolisi Tongá.